Название: Праект

Автор: Радзько Нэлі

Издание: Новополоцк сегодня. – 2021. - 29 янв. - С. 16

У межах Года народнага адзінства Наваполацкая цэнтралізаваная бібліятэчная сістэма запусціла новы праект “Адкрыць талент у кожным”. Як адзначае яго галоўны ініцыятар – бібліёграф ЦБС Кацярына Коршунава, асноўная мэта ідэі – прадставіць шырокаму колу гледачоў творчыя памкненні гараджан.

“Што заўсёды яднае розных людзей? Захапленні, майстэрства, творчасць. У нашым горадзе шмат цікавых на натуры асоб, якія чым толькі не займаюцца…Нам хочыцца расказаць пра іх, паказаць на нашых пляцоўках. Гэта могуць быць прадстаўнікі самых розных прафесій, якія ў вольны час займаюцца мастацтвам, музыкай, літаратурай, фатаграфіяй… Мы адкрыты для сутворчасці з усёй краінай. Рады будзем арганізаваць выставу ці творчы вечар гасцей з іншых гарадоў і вёсак”, - у размове з карэспандэнтам “НС” адзначыла Кацярына Коршунава.

Першай ластаўкай новага праекта стала персанальная выстава дэкаратыўна-прыкладнога мастацтва “Творчы калейдаскоп” майстра з жывапіснага гарадка Бароўка Лепельскага раёна Марыі Хасанавай. Увазе наведвальнікаў яна прапанавала звыш 70 арыгінальных работ па некалькіх накірунках дэкаратыўна-прыкладнога мастацтва (лялькі-абярэгі, плеценыя вырабы з паперы і інш.). Большую частку экспазіцыі складаюць карціны, выкананыя ў тэхніцы “алмазная мазаіка”. Выявы на іх пераліваюцца яркімі фарбамі рознакаляровых страз. Пабачыць выставу можна да 21 лютага. А самому стаць удзельнікам праекта – калі заўгодна. Падрабязная інфармацыя размешчана на новай віртуальнай пляцоўцы “Арт-сіці” сайта ЦБС novopolotsk-lib.by.