Название: Свята дзіцячай кнігі
Автор: Краснова–Гусачэнка Тамара
Издание: ЛіМ. – 2021. – №16 (23 крас.). - С. 2.
Творчая сустрэча дзіцячай пісьменніцы Ірыны Багданавай з вучнямі Кастрычніцкай школы адбылася ў бібліятэцы аграгарадка Акцябрскі Віцебскага раёна. Імпрэзу арганізавала Віцебскае аддзяленне Саюза пісьменнікаў Беларусі разам з загадчыцай тутэйшай кніжніцы Таццянай Дзмітрыевай.
Вершы Ірыны Багдановай многія ведаюць на памяць, а сяброўская манера весці з дзецьмі пазнавальную гутарку захапляе юных чытачоў. У межах тыдня дзіцячай і юнацкай кнігі пісьменніца правяла больш за 20 сустрэч ў бібліятэках, сярэдніх школах і гімназіях Полацка і Наваполацка. Для дзяцей заўсёды ладзяцца літаратурныя квэсты, віктарыны, пазнавальна-забаўляльныя гульні, майстар-класы фанетычнай і граматычнай практык.
Адной з яркіх падзей стала сустрэча, яка прайшла ў Наваполацкай дзіцячай бібліятэцы імя А.С.Пушкіна, дзе сабраліся загадчыкі 14 школьных кніжніц і вучні СШ №10. Напрыканцы сустрэчы пісьменніца падарыла школьным бібліятэкам больш за 150 уласных кніг.
Дарэчы, Ірына Андрэеўна – член Саюза пісьменнікаў Беларусі, Саюза пісьменнікаў Саюзнай дзяржавы, лаўрэат абласной літаратурнай прэміі імя Петруся Броўкі ў намінацыі “Літаратура для дзяцей”, аўтар 9 кніг.