Своеасаблівым эпілогам да святочных мерапрыемстваў, прысвечаных 66-й гадавіне горада Наваполацка, стаў 17-ты песенна-лірычны канцэрт-марафон народнага літаратурна-музычнага калектыву «Крылы», які ладзіўся 11 чэрвеня ў зале мастацтваў цэнтральнай бібліятэкі імя У.Маякоўскага.

Публіка збіралася пад прыгожую ўрачыстую песню «Мая Белая Русь» наваполацкай паэтэсы Тамары Талкачовай і вядомага беларускага кампазітара Ізмаіла Капланава, якая гучала ў запісу ў выкананні заслужанай артысткі Беларусі Ірыны Дарафеевай. Стартаваў чарговы марафон вершамі і песнямі Тамары Талкачовай пра Наваполацк у выкананні Іны Мароз і Алены Штукінай.

Кіраўнік НЛМК «Крылы» Галіна Сташкевіч звярнула ўвагу на кнігі пра цудоўны і працавіты Нафтабуд, якія былі прадстаўлены на выставе. Гучалі вершы і песні наваполацкіх паэтаў-першабудаўнікоў Міхаіла Блізнеца і Юрася Касцюка ў выкананні Ганны Цапкінай – удзельніка гурта «Эстрадны вакал» палітэхнічнага каледжа (настаўнік А.У.Штукіна). Верш «Я славлю жизнь» Ніны Дзянісавай чытала Валянціна Пакрапіўная, якая таксама падарыла гораду дзве музычныя п’есы «Дзвінская мелодыя» і «Вясёлая карусель». Свае лірычныя вершы чытала Наталля Арцёменка. Аляксандр Ігонін парадаваў прыгожым выкананнем вядомага рускага раманса «Только раз бывают в жизни встречи» і калектыўным сачыненнем «Счастье садовода».

Галіна Сташкевіч прачытала сваю лірычную замалёўку «Песня Дзвіны» і верш «Мой город над Двиной» Міхаіла Зудзілава, які ўпрыгожыў канцэрт сваімі песнямі пра любімы горад: “Первая палатка», «Баллада о Новополоцке», «В городе моём вечер». Іна Мароз падрыхтавала меладэкламацыю трох цудоўных аўтарскіх лірыка-паэтычных кампазіцый. Яе кампазіцыя «Крыніца майго натхнення» стала фінальным нумарам святочнага канцэрта-марафона.

Больш падрабязна пра гэта мерапрыемства на старонцы літаратурна-музычнага аб’яднання «Крылы» (Facebook).